那天再重聚

上年尾嘅香港行內，包含咗一個我期待咗一年嘅聚會－12/18 中學母校舊生大團聚－呢個活動之所以能夠「誕生」，臉書可謂功不可沒！

我嘅中學母校已經晌 1994 年結束，佢係跟隨香港學齡兒童人口轉型嘅產物：1977年9月，一間六層官小校舍，五層係小學生用，而第六層就係三班中一用；我係1979年入讀，第三屆，當時已經再無小學生嘞；1984年我中五畢業，而母校亦係第一年同另一間應該都係官小變官中嘅學校合辦預科班，不過母校係辦理科，我地文科三班嘅同學（除咗重讀中五嘅），都一定要同母校講拜拜；至1994年母校終於難逃「殺校」命運，初期好似改為教育局 office，而家又改返成小學。好一個循環！

自己由畢業後同大約十多個舊同學一直有聯絡，隨住年月同人海飄流，從最初一年兩次十三、四人嘅活動至近年最多四、五人一年一聚.....不過仍要感恩擁有廿多年嘅友誼。

2009年中晌臉書嘅 group 功能內用母校嘅名去搜尋，竟然已經有校友開咗個舊生 group，我當然立即加入，而且短時間內仲「重遇」幾個同級嘅同學。或者因為母校已經不再存在，我地返而對佢更加懷念，呢個 alumni FB group 有五百幾成員，係母校歷年學生總人數差不多三分一。而2009年尾終於有校友發起攪個 mega reunion，大家利用臉書作為號召聯絡人手嘅平台，之後 organising committe 成立、開會、策劃、各種行動，臉書理所當然地成為分享資訊、相片、進度嘅工具之一。

2010-12-18 我終於見到唔少廿多年無見嘅面孔，興奮之情今日仍然歷歷在目！