失蹤一陣 (updated)

家人到訪 + 之後出外遊玩...... 至早六月四日返到西班牙～大家睇住麻煩個曬太陽懶樣先喇～

Status update : I will be back in Spain on 20 June due to extension of hubby's assignment in Ho Chi Minh City.

睡蓮 Nymphaea 'Attraction'

（宋）周敦頤

水陸草木之花，可愛者甚蕃。晉陶淵明獨愛菊；自李唐來，世人盛愛牡丹；予獨愛蓮之出淤泥而不染，濯清漣而不妖，中通外直，不蔓不枝，香遠益清，亭亭靜植，可遠觀而不可褻玩焉。予謂菊，花之隱逸者也；牡丹，花之富貴者也；蓮，花之君子者也。噫！菊之愛，陶後鮮有聞；蓮之愛，同予者何人；牡丹之愛，宜乎眾矣。

我愛君子亦愛富貴...... 博愛也，嘿嘿～

隱者....隱～隱～

話說我同老公共用一個賬號，因為方便一鑊過買 credits 然後各自打電話返家鄉；不過佢除咗打電話俾阿爸阿媽，絕少用 Skype，所以個 account 基本上係我用晒，直至最近佢個美籍德裔朋友G開始用呢個方法同佢溝通.....

G係一個七十歲嘅男子，佢地兩條友仔識咗廿幾年，不過近十年聯絡唔多，一年頂多講幾次電話～而我只係見過G一次：1999年我地由香港搬去米蘭住，佢去德國省親順便過嚟探我地幾日。上年八月佢又玩去德國省親，原本諗住嚟西班牙幾日，不過八月熱屎辣辣，我地真係驚會熱鬼死佢，叫佢起碼九月中後先好嚟... 我諗佢冇打算留晌歐洲咁耐，終於冇嚟到，但起碼從此多返聯絡。

今年四月初佢失驚無神飛之前話俾老公聽去菲律賓結婚，應該起碼一個月之後先返美國～當時我地好愕然，之前都冇聽G講過有親密女友，不過呢兩個麻甩佬不嬲都講啲不著邊際無內容嘅嘢.... 我有諗過佢係咪為咗幫人假結婚入美籍，而老公又戲言諗佢「相對地平價請個妹仔」。基於我老公一貫溝通作風：人地唔講佢一定唔問，任得之後G自己想講乜佢就聽乜..... 不過我話：站在朋友立場，佢返到美國之後起碼都要主動恭喜吓卦！

不過.....兩星期之後某日，晌 Skype度見到G喎，我即刻召老公坐低同佢傾..... 原來佢「女友」悔婚踢佢返美國！我聽老公轉述：大約話呢位菲律賓女仕嘅仔女晌美國住而G識得佢地，咁G就識到佢，「細節」嘅嘢唔知勒.....總之佢過到菲律賓之後女友話自己係非常 religious 但G爛口兼 arrogant，相處唔嚟，要多啲時間考慮，起碼一年後～

G死死地氣返歸而且每日非常忠於晌 Skype，一見我個 account online就打嚟搵我老公吹兩咀！講真我冇乜嘢同佢講，我基本上同佢唔熟，我多數扮行開咗唔接佢電話，跟住話返俾老公知。四月尾開始老公去胡志明市出差六個星期，某日G又晌Skype打嚟，我諗住佢年紀大唔記得老公已經講咗佢聽出差唔晌屋企，咪接咗個call 同佢講幾句囉，點知佢見有人聽佢講，佢竟然講多啲被拒婚細節俾我知！例如佢話佢女友唔鍾意G kiss 佢，又話女友話結婚後唔可以 kiss..... 唉～呢啲嘢我真係唔想知呀！我之後同老公晌 Skype 度傾（佢開咗另一個 account），點解我咁有幸聽啲咁 'juicy' 嘅嘢，我要佢話清楚俾G知道佢已經有自己account，我雖然八，但我唔想同G傾呀！

今日晌 Skype又見到G，佢無 call 我，不過佢 send message 同我say hi，我回佢話同梗阿妹傾偈（其實唔係，係敷衍佢，等佢以為我忙唔好打攪我），點知佢問我妹結咗婚未，我一時手快打話未，跟住又問我妹幾歲，可唔可以 send張我妹嘅相俾佢，我妹識唔識英文，又問我估我妹有冇興趣同佢 chat......天呀～我扮顧住傾偈反應慢，只係斷續答咗佢話我呢部新電腦冇我妹嘅相、我妹XX 歲、佢當然識講英文....之後繼續扮忙無答佢.....後來佢話自己要去邊處邊處.... 我當然拜拜佢喇！

阿伯！你唔係呀嘛！你苦悶嘅話去試下 match.com 喇～我阿妹連我都嫌煩，點會有興趣同個做得佢老豆嘅耆英 chit chat 呀？

阿伯！你唔係呀嘛！雖然唔係三唔識七，未經人同意我點解要 send 相俾你呀？

我嬲呀！我之後同老公 Skype時講佢聽我覺得 the whole thing is ridiculous and disgusting，晌我忘記不快之前，我唔要再同G有任何方式嘅溝通，我暫時未有智慧去了解同幫助G呢個年紀嘅感情問題！

為咗唔再冒險，我將Skype 嘅 online status 設定做隱身～

p.s.我實在搵唔到一幅認為襯呢個 post嘅圖.....破例一次齋字！

蒙福的豬

圖片源自互聯網

我唔可以算係一個醒瞓嘅人：一般雜聲唔足以嘈醒我；除咗麻煩（&燒賣）嘅吠聲，同埋電話鈴聲。

前兩日同麻煩行街街時經過屋企對上兩條街英國人David嘅門口，見到佢地戙咗個出售牌，咁啱女主人Gerry晌屋外食煙，我多咀停低同佢傾幾句。Gerry之前已經同我講過佢俾呢個小區內嘅狗吠到就快發顛：因為區內嘅西班牙人通常都將啲（中、大型）狗用長鏈綁晌屋外，吠聲大係難免嘅事.... 其中一兩隻有時悶得滯都吠幾耐吓..... 最近佢實在頂唔順我住果條街一號嘅 Luna。Luna 亦係被長鏈綁晌屋外嘅一份子，Gerry 話佢好興午夜十二點幾一點時吠，而且又有附近其他狗吠和應，嚴重影晌佢嘅睡眠質素同精神健康！佢冇法令他人嘅狗唔吠，唯有賣屋搬走，佢地打算留返晌呢個小鎮，但係會租屋。不過哩..... 晌現今歐洲嘅經濟氣候下，想唔蝕而快快賣得出並非易事！

其實Luna午夜吠係回暖之後嘅事，因為多咗人深夜仍然晌街上，佢聽到陌生人聲先吠。我屋企同佢只係隔一間，但因為我哋二人一狗全部都非常有「福」，識得彈性「隔音」，通常都大覺瞓天光，呵呵～

吾家有「梨」初長成

可惜近來天陰多雨，汁應該冇問題，甜度就.....唔多睇好～