話說我同老公共用一個賬號，因為方便一鑊過買 credits 然後各自打電話返家鄉；不過佢除咗打電話俾阿爸阿媽，絕少用 Skype，所以個 account 基本上係我用晒，直至最近佢個美籍德裔朋友G開始用呢個方法同佢溝通.....
G係一個七十歲嘅男子，佢地兩條友仔識咗廿幾年，不過近十年聯絡唔多，一年頂多講幾次電話～而我只係見過G一次：1999年我地由香港搬去米蘭住，佢去德國省親順便過嚟探我地幾日。上年八月佢又玩去德國省親，原本諗住嚟西班牙幾日，不過八月熱屎辣辣，我地真係驚會熱鬼死佢，叫佢起碼九月中後先好嚟... 我諗佢冇打算留晌歐洲咁耐，終於冇嚟到，但起碼從此多返聯絡。
今年四月初佢失驚無神飛之前話俾老公聽去菲律賓結婚，應該起碼一個月之後先返美國～當時我地好愕然，之前都冇聽G講過有親密女友，不過呢兩個麻甩佬不嬲都講啲不著邊際無內容嘅嘢.... 我有諗過佢係咪為咗幫人假結婚入美籍，而老公又戲言諗佢「相對地平價請個妹仔」。基於我老公一貫溝通作風：人地唔講佢一定唔問，任得之後G自己想講乜佢就聽乜..... 不過我話：站在朋友立場，佢返到美國之後起碼都要主動恭喜吓卦！
不過.....兩星期之後某日，晌 Skype度見到G喎，我即刻召老公坐低同佢傾..... 原來佢「女友」悔婚踢佢返美國！我聽老公轉述：大約話呢位菲律賓女仕嘅仔女晌美國住而G識得佢地，咁G就識到佢，「細節」嘅嘢唔知勒.....總之佢過到菲律賓之後女友話自己係非常 religious 但G爛口兼 arrogant，相處唔嚟，要多啲時間考慮，起碼一年後～
G死死地氣返歸而且每日非常忠於晌 Skype，一見我個 account online就打嚟搵我老公吹兩咀！講真我冇乜嘢同佢講，我基本上同佢唔熟，我多數扮行開咗唔接佢電話，跟住話返俾老公知。四月尾開始老公去胡志明市出差六個星期，某日G又晌Skype打嚟，我諗住佢年紀大唔記得老公已經講咗佢聽出差唔晌屋企，咪接咗個call 同佢講幾句囉，點知佢見有人聽佢講，佢竟然講多啲被拒婚細節俾我知！例如佢話佢女友唔鍾意G kiss 佢，又話女友話結婚後唔可以 kiss..... 唉～呢啲嘢我真係唔想知呀！我之後同老公晌 Skype 度傾（佢開咗另一個 account），點解我咁有幸聽啲咁 'juicy' 嘅嘢，我要佢話清楚俾G知道佢已經有自己account，我雖然八，但我唔想同G傾呀！
今日晌 Skype又見到G，佢無 call 我，不過佢 send message 同我say hi，我回佢話同梗阿妹傾偈（其實唔係，係敷衍佢，等佢以為我忙唔好打攪我），點知佢問我妹結咗婚未，我一時手快打話未，跟住又問我妹幾歲，可唔可以 send張我妹嘅相俾佢，我妹識唔識英文，又問我估我妹有冇興趣同佢 chat......天呀～我扮顧住傾偈反應慢，只係斷續答咗佢話我呢部新電腦冇我妹嘅相、我妹XX 歲、佢當然識講英文....之後繼續扮忙無答佢.....後來佢話自己要去邊處邊處.... 我當然拜拜佢喇！
阿伯！你唔係呀嘛！你苦悶嘅話去試下 match.com 喇～我阿妹連我都嫌煩，點會有興趣同個做得佢老豆嘅耆英 chit chat 呀？
阿伯！你唔係呀嘛！雖然唔係三唔識七，未經人同意我點解要 send 相俾你呀？
我嬲呀！我之後同老公 Skype時講佢聽我覺得 the whole thing is ridiculous and disgusting，晌我忘記不快之前，我唔要再同G有任何方式嘅溝通，我暫時未有智慧去了解同幫助G呢個年紀嘅感情問題！
為咗唔再冒險，我將Skype 嘅 online status 設定做隱身～
p.s.我實在搵唔到一幅認為襯呢個 post嘅圖.....破例一次齋字！
6 comments:
你一定好 Q 慶⋯⋯
我未見過你可以打甘長的中文博文，仲要無相！
你米要改名做隱記？
但好奇怪⋯⋯個G好鍾意亞洲女性甘。
可能你老公系佢面前讚得你多呀，
所以佢死都要揾個亞洲女人陪下佢。
其實我呢幾日心情已經唔十分靚：因為星期日從一個中學同學處得知另一個身住外地嘅同學有腸癌三期，做咗手術正在化療，佢個囡四、五歲咋..... 我地細個時有一齊去溜冰踩roller...... 知道後個心翳住翳住～
我嬲係因為：佢以為自己係乜水呀？亞洲女性一見佢要立即投懷送抱呀？佢當我係乜呀？淫媒呀？我覺得被冒犯！！如果佢係真愛呢個菲女友而雙方真有誠意結婚，係咪應該檢討下對方嘅不滿呢？我覺得唔係囉！
我唔了解老年人嘅情懷&生理需要喎.... 況且，佢同老朋友都冇講 juicy details，同唔係咁熟嘅老朋友老婆講唔係好妥呀嘛！雖然佢應該係好想有人聽佢吐苦水，我唔覺得自己係適當人選～
都明點解你個心翳住翳住～
其實男人之間個關係好奇怪，
只可以作大（仲要無甘大都作好大），
D 心底話呢，男人之間唔會直接講。
所以揾個唔系好熟的女人吐噻出黎。
可能捻住你都系亞洲女人，可以指點迷津下。
但佢又懵，揾錯人咯（可能都系呢個原因個菲律賓女士錠佢走）。
而家我避之則吉算數..... 希望佢唔會話苦悶得滯要過嚟探B哥..... 佢嚟我速逃..... 我其實唔係好識同老年人相處.... 同我媽都話可以講下八卦無聊嘢.....同老男人即使係我老豆我都有啲口啞啞 -__-|||
甘你醒目喝住 B 哥點都唔好俾佢黎。
要見就一系 B 哥去探佢好過。
真系要黎唔該提早通水你知道。
唉～B哥係唔會肯自己一條友特登去探人，除非係出差順便架咋.... 我成日都話佢父母無乜理由好掛住我，叫佢一個人去比利時省親得喇，佢唔掣呀！
我已經講咗幾次俾佢聽我隱身避G，佢如果仲唔醒目的話我要兜巴星佢！
Post a Comment