嚟咗歐洲十年幾，一路都係飲瓶裝水，無他，我覺得水喉水好大陣味！一般歐洲嘅瓶水多數係「礦泉水」﹔蒸餾水（無試過飲唔飲得）係用嚟放入熨斗、車嘅水箱、增濕機.....等等度用。
我哋住呢區晌西班牙至硬水區之內，因此我哋裝咗一個 limescale prevention device 晌主喉，減低家電如熱水爐、洗衣機、洗碗碟機...... 內部喉管因硬水加熱後引致 limescale 積聚而壞機嘅可能。幫我裝呢個東東嘅英國佬 David 都係住晌呢個小區，賣花梗要讚花香喇：佢就咁飲水喉水兼且佢屋企電水壺因此唔需要常常 descale。其實個 device 係軟化唔晒啲「硬嘢」嘅，因為我仍然要久不久 descale 電熱水壺、espresso 機、同熨斗、洗衫時仍有落 Calgon（一半建議份量）、洗碗碟機都係用 Calgon tablets....... 不過我都係無直接飲水喉水........
直至四個月前，我發覺飲瓶裝水實在製造太多膠垃圾！（都製造咗十年多）於是....... 我晌 hypermarket 買咗個 Brita 濾水壺...... 我同麻煩開始飲水喉水嘞～ 而我煲水沖茶、整咖啡同熨衫都係用 Brita 濾咗嘅水..... 經過雙重處理，真係無乜 limescale buildup，至少我都幾個月唔駛 descale。而因飲水而製造嘅膠垃圾亦減少至一個月一個濾芯，自己都覺得無咁對唔住地球先生～
